ఆడబిడ్డల ఆటపాటలతో మార్మోగిన సిరిసిల్ల.
జిల్లా వ్యాప్తంగా ఘనంగా ఎంగిలిపూల బతుకమ్మ సంబరాలు.
పల్లెపల్లెనా పండుగ శోభ.. వాడవాడలా సందడి.
మానేరు తీరాన మహిళల కోలాహలం.
సిరివెలుగు, రాజన్న సిరిసిల్ల: ప్రకృతి ఒడిలో విరబూసిన రంగురంగుల పూలు.. వాటితో పేర్చిన అందమైన బతుకమ్మలు.. గౌరమ్మకు భక్తిశ్రద్ధలతో పూజలు.. ఆప్యాయతలు పంచుకునే ఆడబిడ్డలు.. జానపద గీతాల నడుమ లయబద్ధంగా సాగిన ఆటపాటలు.. వెరసి తెలంగాణ సంస్కృతి, సంప్రదాయాలకు ప్రతీకగా నిలిచే ఎంగిలిపూల బతుకమ్మ వేడుకలు రాజన్న సిరిసిల్ల జిల్లా వ్యాప్తంగా శనివారం వైభవంగా ప్రారంభమయ్యాయి. ఉదయాన్నే మహిళలు, యువతులు, చిన్నారులు కొత్త బట్టలు ధరించి తంగేడు, గునుగు తదితర తీరొక్క పూలతో బతుకమ్మలను అందంగా పేర్చారు. బతుకమ్మపై గౌరమ్మను ప్రతిష్ఠించి భక్తితో పూజలు నిర్వహించారు. అనంతరం సాయంత్రం వేళ కాలనీలు, వీధులు, కూడళ్లలో బతుకమ్మలను కొలువుదీర్చి వాటి చుట్టూ చేరి సంప్రదాయ పాటలు ఆలపిస్తూ ఉత్సాహంగా ఆడిపాడారు. ఈ సంప్రదాయం మహిళల మధ్య ఆత్మీయతను, అనుబంధాలను మరింత బలోపేతం చేసింది.
మానేరు తీరాన పూల సందడి.
పల్లె, పట్టణం అనే తేడా లేకుండా ప్రతి వాడలోనూ బతుకమ్మ సంబరాలు అంబరాన్నంటాయి. జిల్లా కేంద్రం సిరిసిల్లలో డీజే మోతలు, బతుకమ్మ పాటలతో పండుగ వాతావరణం మార్మోగింది. అనంతరం మహిళలు తమ బతుకమ్మలను పట్టణంలోని బతుకమ్మ ఘాట్‌కు తీసుకొచ్చి సామూహికంగా ఆటపాటలతో సందడి చేశారు. రంగురంగుల పూలతో అలంకరించిన బతుకమ్మలు, సంప్రదాయ దుస్తుల్లో ముస్తాబైన మహిళలతో ఘాట్‌ కళకళలాడింది. మహిళలు, యువతులు, చిన్నారులతో మానేరు తీరం కిటకిటలాడింది. పూజలు, ఆటపాటల అనంతరం బతుకమ్మలను మానేరు నదిలో నిమజ్జనం చేసి తొలి రోజు వేడుకలను ఆనందోత్సాహాల మధ్య ముగించారు. పూల పండుగలో భక్తి, ప్రకృతి ఆరాధనతో పాటు ఆడబిడ్డల ఆత్మీయత, తెలంగాణ సంప్రదాయాల వైభవం ప్రతిబింబించాయి.
